10
Mar
08

Carito Minang

Gilo Mancaliak Baruak Barayun
Oleh : Noor Indones St. Sati

Babeda jo hari-hari biaso, pagi ko palanta Mak Sati rami urang batandang. Walaupun suaro bagalau, namun jamaah lah duduak taratur, sambia mairuik sarobaik nan dihidangkan si Usuik.
Mak Sati lah duduak di kurisi tinggi tampek baliau biaso meleseang “Assalamualaikum.” Mak Sati mambukak sidang. Nan hadir samo-samo manjawab salam walaupun arang barisi ayie sarobaik.
Mak Sati mulai mangecek: “Sambah Kali Marajo, Tan Menan, Ajo Udin sambah.” “Sungguah baduo jo batigo nan tasabuaik-taimbau gala, namun nan Ambo mukasuik,- sagalo kito nan hadir ko; kok dirantang, namuahnyo panjang; dikumpa sajo, nak nyo singkek. Diambiak sado nan paguno.”
Silakan Kali Marajo manyampaikan nan takana di hati, talinteh di kiro-kiro. Kok gadang nak dapek diliek rupo- kok nyariang nak samo kito danga ! sakian sambah.
Sabananyo sambah ka ambo.
Kini bak urang bagak taimbau turun. Tasuruah di urang nan ka pai- taimbau di urang nan ka tibo; namun samantang dek baitu, bukanlah amboko kukuak panjang-ranggah takulai, ikua tajelo ka jarami.
Ibareik balayie lai ba nankodo. Tagak jo nan tahu.
Duduak jo nan pandai.
Ilmu ko dari Mak Sati juo. Karano baru sado itu nan dapek, salanjuiknyo ambo taruihkan jo bahasa biaso.
Ba-a tu Mak Sati.
Nan titiak ditampuang, indak buayo manulak bangkai, indak pangulu maulak sambah.”
Jadilah Mak Sati.
Ko ado masalah ibaraek kusuik nan alun salasai, ibaraek karuah nan alun janiah, yaitu peribahasa “Gilo mancaliak baruak barayun.”
Dalam buku “Saratuih peribaso Minang ” nan baru Mak Sati tabikkan indak ado peribahaso tu. Kami minta tolong Mak Sati dapek manjalehkan arati kiasan, kamaa arahnyo.
Apo hubuangannyo dengan masyarakaik awak Minangkabau.”
Sampai Kali Marajo!
“Alah.”
Tantang peribahasa nan Kali Marajo mukasuik, memang alun ado dalam buku jilid 1, tapi nanti insyaalah ado di jilid 2. Namun untuak mamanuahi kandak angku-angku, Mak Sati siap manjalehkan.
Caro iko: Mari awak bahas basamo-samo !
“Gilo mancaliak baruak barayun.”
Di siko ado tigo aratinyo.
Partamo, gilo dalam arati sabananyo. Jikok ado urang nan manjadi gilo sasudah manonton baruak barayun pado pertunjukan sirkus, mako itulah nan disabuik gilo sabananyo gilo mancaliak baruak barayun.
Kaduo, gilo dalam arati tindakannyo nan gilo.
Mukasuiknyo karajonyo indak masuak aka urang banyak.
Katigo, gilo dalam arati “asyik”, tenggelam dalam dalam satu perbuatan sahinggo lupo taradok karajo nan paralu.
Baa lai paham angku-angku ?
Ajo Udin manyemba. Lai Mak Sati, jaleh nan sajaleh-sajalaehe.
Supayo nak batambah jaleh, tolong dibuekkan contohnyo dek Mak Sati.
Menan tampaknyo sangaik serius!
Ko contohnyo nak labiah taraso. Awak contohkan ka kampuang, nan kiniko sadang basiap-siap manjadikan Sumbar manjadi daerah tujuan wisata utama karano dibukanyo Bandara Katapiang.
Hal iko sasuai jo parintah urang nan bakuaso dan nan punyo pitih di Jakarta.
“Rancak bana”. Indomo maningkah.
Sia nan punyo pitih tu, pulang maklumlah ka hadirin sakalian.
Kito berandai-andai,– suatu waktu, untuak mamahami bantuak daerah pariwisata nan maju, ‘baguru ka nan pandai’, Pemda Sumbar mangirim tim sarato anggota DPRDnyo ka pulau Bali atau ka Chiang May dan Phuket nan banyak penderita HIV nyo.
Mereka perlu melihat serta memahami sacaro hakiki daerah wisata nan maju tersebut, elok-buruaknyo, lua jo dalamnyo, mudarat jo manfaatnyo, tau paralu servis disadiokan sarupo minuman, nightclub, live show, hotel basarato salimuik manggarik-garik nan macam-macam jenisnyo, jugo mancaliak bule batilanjang di pantai Sanur, Kuta dan di kolam renang hotel dsb.
Sakambali dari Bali atau Thailand, tim sarato sagalo aparat nan takaik mamutuihkan daerah Sumbar diprogramkan manjadi daerah wisata nan samo jo di Bali dan kalau paralu malabiahi dari Bali dan Chiang May mako karajo tu namonyo gilo nomor duo, yaitu gilo pikiran.
Mereka lupo bak raso anak-kamanakan nyo di kampuang masih banyak nan berkainginan tatap sebagai urang Minangkabau yang punyo falsafah hidup ‘adat basandi syarak, syarak basandi kitabullah’.
Niniek jo inyiek muyang kito rasonyo indak parnah maninggakan pangajaran kapado anak-cucunyo ‘untuak manjadi pelayan bagi urang lain nan datang dari lua nagarinyo’ (kiniko disabuaik turis atau wisatawan).
Daulu katiko adat masih kuat di jaman panjajahan Balando, anak-kamanakan indak buliah doh manjadi babu Cino di Bukittinggi dan Padang!
Kok nyampang hiduik di kampuang lah mularek bana, mereka manyuruah kamanakannyo pai marantau.
Pitih nan takumpua dari rantau tu, nan dikirim pulang ka kampuang.
Kini caro sarupo itu alah dipraktekkan dek urang India. Dolar indak dicari di kampuang dengan caro ‘manjua, apolai maiklankan’ pusako-alam dan anak gadih kito, tapi mereka disiapkan pai marantau ka mancanagara dengan modal nan cukuik, yaitu pandidikan nan bamutu sarato katerampilan nan tinggi.
Marantau kiniko lah babeda jo caro marantau apak awak jaman saisuak, nan cukuik babekal kamauan sajo untuak manjadi padagang kaki limo.
Rato-rato satu orang India nan pai marantau ka Amerika mangirim pitih ka kampuangnyo 10.000 dolar atau lk 90 juta setahun.
Kok ado surang sajo dari tiok-tiok nagari di Sumbar nan sarupo urang India tu, mako kampuang awak akan mandapek kiriman nan luar biasa banyaknyo.
Jaankan pai marantau ka Amerika, kiniko urang Sumbar hanyo seorang sajo nan barani mandaftar manjadi parantau ‘bergengsi’ ke Jakarta untuak manjadi anggota Komisi Yudisial Nasional nan gaji cukuik gadang (jumlah semua pendaftar 219).
Seandainyo si Usuik manjadi tukang angkek-angkek koper turis, si Upiak jadi pelayan atau manjua talua asin di pinggiran hotel Singkarak mako nan dapek dek inyo indak dolar doh, tapi rupiah paliang banyak sapuluah ribu sahari.
Dan iko baban nan paliang barek bagi si Usuik, seumpamonyo inyo manjadi supir taksi dan suatu malam nan dingin diminta carikan ‘salimuik taba’ dek turis.
Ba-a manulaknyo, takuik servis indak mamuaskan tamu, karano kampuang awak alah dipromosikan manjadi daerah tujuan wisata ka mancanagara!
Si Bule, si Sipit tamasuak Negro nan dari Afrika tu, indak mangarati kato-kato adat jo syarak sarato kitabullah nan memang indak biaso mereka danga apolai dipraktekkan.
Nan dolar indak bakalan masuak ka urang kampuang tapi masuak ka saku si Bule, si Sipit pemodal jo si centeng turis basaragam resmi di Padang dan Jakarta.
Mak Sati, barangkali ado nan mereka lupokan, yaitu manjadikan urang Minang nan di kampuang labiah daulu manjadi urang Sumbar saratuih persen.
Sumbar tu kan ‘rantau’ urang Minang nan kondisinyo kini ko lah samo kito lihek dan danga. Contohnyo, kalau urang Minangkabau daulunyo pernah mendapek nomor satu di bidang pendidikan, sastra dan politik di nusantara ini, mako urang Sumbar alun pernah kito danga prestasinyo.
Pernah mandapek nomor satu dari balakang di bidang olah raga dalam PON dan nomor satu jumlah anggota DPRD nyo divonis basalah nak masuak ka kandang si tumbin.
“Batua.” Sado nan hadir majawek sarantak, kecuali Sutan Kayo.
Mak Sati mambari kesempatan kapado Sutan Kayo.
“Si Minang nan di rantau lua propinsi Sumbar pun paralu disumbarkan daulu, supayo program ko mulus jalannyo.”
Nan hadir sarantak manyahuik, tanpa kecuali, tamasuak si Usuik nan sadang manyusun-nyusun ubek ramuan.
Contoh nan katigo, dek gilo mancaliak konsep wisata sarupo di Bali lupo mauruih Perda tantang kambali ka nagari; sahinggo sampai kini indak tantu ujuang pangkanyo nasib Perda tu.
Alun parnah tadanga dek awak Pemda memfasilitasi terbentuknyo persatuan wali-wali nagari atau musyawarah para wali nagari nan otonom itu.
Contoh ko aratinyo gilo asyiek.
Malin Mudo manunjuak !
Silakan Malin Mudo. Mak Sati indak ragu-ragu.
Tantang kasimpulan tadi, barangkali sado awak lah dapek dikatokan saciok bak ayam, sadanciang bak basi. Namun samantang dek baitu, ambo tambah supayo labiah positif awak undang pejabat Sumbar nan mamarentah di kampuang tu ka rantau agak satahun.
Awak jalehkan isi mukasuik “Adat basandi syarak, syarak basandi kitabullah.” Atau awak masuakkan mereka itu kasadonyo ka sakolah S3 di Universitas Parpatiah nan Sabatang di siko.
Supayo pamarentahan indak vakum, awak tugaskan urang dari rantau manggantikannyo. Lah abih satahun tamat S3, awak patukakan baliak.
Nan lain marantak-rantak tando satuju.
Mak Sati maaniangkan suasana: Mukasuik Sutan Kayo sambia mangatokan tindakan mereka salah.
Mari kito carikan solusinyo! “Tapek bana.” sarantak pulo hadirin manyahuik.
Kok inyo indak amuah sakola ka rantau, ado alternatif nan kaduo, yaitu urang rantau undang ka kampuang. Jalehkan oleh mereka, bak raso adat basandi syarak, syarak basandi kitabullah indak paralu kini lai, katinggalan jaman, lah kuno, dsb.
“Batambah tapek.” Sutan Pangulu basuaro lantang.
“Kok iko nan tajadi, kito bulu-i mereka jo etongan.” manambah pulo Sutan Marajo.
Jadi kini, dek nan di ama alah pacah, nan dimukasuik alah sampai, kok duduak alah maraso panek, tagak lah nak maayun langkah, kami parmisi nak pulang ka tampek masiang-masiang.
Kali Marajo minta diri. Mak Sati sambia mananggapinyo jo pantun:
Ditatah, indak ka tatatah
Ditutuah juo nan bengkok
Ditagah indak ka tatagah
Disuruah juo nan labiah elok.


1 Response to “Carito Minang”


  1. 1 weldy
    Oktober 6, 2010 pukul 3:55 pm

    buek lah crto yang lebih indah lg,, wak pasti membaco.


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s


%d blogger menyukai ini: